Tir ac amaethyddiaeth – Sicrhau da byw iach a chynhyrchiol, cyn lleied â phosibl o gnydau’n methu, iechyd y pridd, peillwyr a phlâu, storio dŵr ar y fferm, rheoli risgiau tanau gwyllt, a lleihau’r perygl o lifogydd i dir âr.

Morol, pysgodfeydd a dyframaethu - Cynnal stociau pysgod a gweithgareddau dyframaethu iach, gwydn, gan sicrhau dŵr croyw, dyfroedd morol ac aberol o safon, addasu arferion pysgota a dyframaethu i newidiadau mewn tymheredd ac asideiddio, a rheoli a lleihau lledaeniad plâu, clefydau a rhywogaethau ymledol.

Natur, mawndiroedd, coedwigoedd a choetiroedd – Rôl natur a mawndiroedd wrth addasu i newid yn yr hinsawdd a storio carbon, priddoedd ac iechyd pridd, lleihau plâu, clefydau a rhywogaethau ymledol, ansawdd dŵr a diogelu rhywogaethau daearol a dŵr croyw a morol, coetiroedd a choed gan gynnwys eu rôl yn atal llifogydd, darparu cysgod, atafaelu carbon, diogelu cynefinoedd bywyd gwyllt a chefnogi diwydiant pren cynaliadwy.

Rhwydweithiau a gweithrediadau trafnidiaeth gwydn – Sicrhau bod asedau trafnidiaeth presennol (ffyrdd, rheilffyrdd, meysydd awyr a phorthladdoedd) yn cael eu paratoi ar gyfer risgiau ac effeithiau hinsawdd heddiw ac yn y dyfodol, ac addasu seilwaith newydd. 

Sicrwydd cyflenwad a gwytnwch ar lefel system ynni – Sicrhau bod cynlluniau addasu yn ystyried capasiti cynhyrchu, hyblygrwydd, afreidrwydd, cymysgedd a lleoliad, a lleihau bregusrwydd asedau ar gyfer pob gweithredwr trydan a nwy mawr.

Telathrebu a gwytnwch ac asedau ar lefel system – Cynllunio wrth gefn ar gyfer toriadau sy’n gysylltiedig â’r tywydd, gan gynnwys afreidrwydd wrth ddylunio a gweithredu systemau, amrywiaeth technoleg, diogelu asedau telathrebu a TGCh.

Seilwaith dŵr a dŵr gwastraff – Diogelu seilwaith dŵr, ansawdd a chyflenwad dŵr rhag llifogydd, codiad yn lefel y môr ac amhariad sy’n gysylltiedig â’r tywydd, cynllunio ymateb i ddigwyddiadau, lleihau’r galw gan aelwydydd a chynyddu effeithlonrwydd defnyddio dŵr, lleihau gollyngiadau a sicrhau cyflenwad preifat digonol.

Diogelu busnesau a gweithwyr rhag effeithiau hinsawdd - Lleihau risgiau i safleoedd busnes a cholledion cynhyrchiant, diogelu iechyd a lles gweithwyr rhag tymereddau uwch, a darparu amgylchedd gwaith diogel.

Nodi a rheoli risgiau a chyfleoedd cadwyn gyflenwi – Sicrhau bod gan fusnesau gynlluniau cadernid cadwyn gyflenwi da ar waith, a gwneud y mwyaf o gyfleoedd i allforio nwyddau a gwasanaethau addasu i’r hinsawdd yn y Deyrnas Unedig.

Diogeledd bwyd - Lleihau aflonyddwch i gadwyni cyflenwi bwyd a bwyd anifeiliaid, sicrhau bod risgiau i ddiogelwch a safonau bwyd yn cael eu hystyried o fewn cytundebau masnach y Deyrnas Unedig, lleihau risgiau cadwyn gyflenwi, lleihau bregusrwydd i siociau pris bwyd ac effeithiau ar fforddiadwyedd bwyd a chynnwys maethol.

Cyllid - Sicrhau bod gan fusnesau fynediad at gyfalaf ac yswiriant gan gynnwys ar gyfer addasu, nid yw prosiectau addasu hyfyw yn methu oherwydd diffyg cyllid, a bod sefydliadau ariannol yn ymgorffori risg ffisegol wrth wneud penderfyniadau ariannol.

Diogelu pobl rhag effeithiau iechyd y newid yn yr hinsawdd a gwneud y mwyaf o unrhyw fuddion iechyd posibl - Effaith newid yn yr hinsawdd ar iechyd a lles pobl a rhagweld a mynd i'r afael â newidiadau sy'n gysylltiedig â'r hinsawdd i glefydau heintus a marwolaethau, gwrth-gydbwyso trafodaethau â'r cyfle i wireddu potensial manteision iechyd meddwl a chorfforol. Iechyd a diogelwch addysgol ac yn y gweithle.

Darpariaeth iechyd a gofal cymdeithasol hygyrch o safon yn ystod tywydd eithafol - Lleihau amhariad tywydd i ofal sylfaenol a chymunedol, ysbytai a lleoliadau cartrefi gofal, a gwasanaethau cysylltiedig a chadwyni cyflenwi, ac ar iechyd a lles y gweithlu, yn ogystal â chynllunio ymateb brys.

Addasu ein trefi, ein dinasoedd a’n cymunedau - Diogelu trefi, dinasoedd a chymunedau rhag llifogydd afonydd, arfordirol, dŵr wyneb a dŵr daear, sicrhau bod cynlluniau rheoli erydu arfordirol ar waith a bod asedau a seilwaith rheoli llifogydd mewn cyflwr da, gan leihau risgiau i bobl ac adeiladau o wres trefol, gwneud y defnydd gorau o seilwaith gwyrdd a glas / datrysiadau seiliedig ar natur a sicrhau bod systemau rhybuddio effeithiol yn eu lle.

Addasu adeiladau preswyl ac amhreswyl newydd a phresennol - Atal gorboethi a rheoli perygl lleithder, amddiffyn adeiladau rhag llifogydd a risgiau eraill sy'n gysylltiedig â'r hinsawdd, sicrhau bod systemau cynllunio'n cael eu datblygu i ystyried gofynion addasu a bod unigolion yn deall sut i fynd i'r afael â risgiau a'u lliniaru, ac alinio polisi addasu a datgarboneiddio i greu atebion system gyfan.

Treftadaeth ddiwylliannol ac amgylcheddau hanesyddol – Rheoli risgiau i asedau diwylliannol a threftadaeth (safleoedd archaeolegol, adeiladau, tirweddau hanesyddol, llongddrylliadau, casgliadau amgueddfeydd, archifau a llyfrgelloedd, llên gwerin, iaith draddodiadol, gwybodaeth ac arferion ac ati), a sicrhau bod rheoliadau a safonau yn cefnogi’r amddiffyniad a chadwraeth briodol o asedau treftadaeth.